01 :: CRONOLOXÍA BÁSICA DE JOSE GIL, PIONEIRO DO CINEMA GALEGO

• 1870: Nace o 3 de abril en Rubiós (As Neves) no seo dunha familia labrega. Era o fillo único de Domingo Gil González (1840-1924) e María Gil Álvarez (1829-1909). En agosto do mesmo ano o pai ingresa na Garda Civil.
• 1884: Vive en Rubiós mentres o pai está destinado no cuartel da Garda Civil da Lamosa.
• 1889: Comeza a traballar no entorno do Balneario de Mondariz, onde se inicia na fotografía creando a súa primeira marca: “La afición artística”.
• 1898: En febreiro casa en Rubiós con Trinidad Sarabia, natural do concello de San Xoán de Río (Ourense).
• 1899: O 25 de xuño nace en Rubiós a primeira filla, María Gil Sarabia.
• 1899: Abre a primeira galería en Ourense, “Fotografía artística” na rúa de Alba. En 1902 trasládase a Progreso 73, converténdose nunha referencia obrigada da fotografía ourensá.
• 1902: O 18 de Marzo nace en Ourense a segunda filla, Rosa Gil Sarabia.
• 1904: A familia trasládase a Vigo. Inaugura a galería “Fotografía Gil” na rúa Carral.
• 1906: Nace en Vigo a terceira filla, Josefa Gil Sarabia, o 11 de abril.
• 1909: Inaugura en Príncipe 49, Vigo, a “Fotografía Gil” unha da galerías fotográficas máis prestixiosas e modernas de Galicia.
• 1910: Merca unha cámara Gaumont e crea “Cinematografía Gil”, iniciando a filmación masiva de películas que difunde polos cinemas galegos e americanos.
• 1914: É nomeado delegado territorial da Ford percorrendo Galicia e filmando numerosas actividades industriais e institucionais da modernidade de Galicia.
• 1918: Falece a súa amada filla María Gil Sarabia de tuberculose pulmonar aos 19 anos. O escultor Asorey a inmortalizará cun marabilloso monumento funerario no cemiterio de Pereiró.
• 1919: Crea a efémera produtora “Galicia Films” xunto co pontevedrés Fausto Otero.
• 1921: Perde a representación da Ford e funda “Galicia Cinegráfica” e a “Sinair Company”.
• 1922: Falece en Vigo, aos 20 anos, a segunda filla Rosa de tuberculose pulmonar.
• 1923: Traslado familiar a Ponteareas onde xestiona o cinema Royalty e o cinema do Balneario de Mondariz.
• 1924: Falece en Ponteareas a terceira filla, Josefa aos 18 anos de tuberculose pulmonar.
• 1926: Primeiro prototipo do “Cinemóvil reclame”. Arderá aos poucos días da inauguración.
• 1927: José Gil e Trinidad Sarabia, orfos de fillos, retornan a Vigo. En Sanjurjo Badía 21 monta os laboratorios definitivos de “Galicia Cinegráfica” coa que realizará preto de 70 documentais ata 1935.
• 1928: Estrea do primeiro “Noticiario de Galicia” no Royalty de Vigo o 20 de decembro.
• 1929: Novo prototipo do “Cinemóvil reclame” que percorre numerosas localidades da provincia de Pontevedra.
• 1935: Vencido e arruinado pola popularización do cinema sonoro, vende o laboratorio e o seu equipamento cinematográfico no mes de agosto.
• 1937: Falece na rúa Elduayen 30 de Vigo, o 1 de xaneiro de 1937 de hemorraxia cerebral.

Imaxes